Դեմքի և մարմնի մաշկի բիոռեվիտալիզացիա

Բիոռեվիտալիզացիան հիալուրոնաթթվի հիմքով պատրաստուկների ներարկումն է մաշկի մեջ։ Պրոցեդուրայի նպատակը ոչ թե դեմքի գծերը փոխելն է, այլ մաշկի որակը բարելավելը՝ խոնավացնել այն, վերադարձնել առաձգականությունն ու հավասար երանգը։ «ՄեդԷսթ» կլինիկայում բիոռեվիտալիզացիա կատարում են դեմքին, պարանոցին, դեկոլտեի գոտում և ձեռքերին։

Ում է հարմար

• մաշկը չոր է և ջրազրկված, կա թեփոտում և ձգվածության զգացում․
• դեմքի գույնը խամրած է, մաշկը հոգնած տեսք ունի և կորցնում է առաձգականությունը․
• ի հայտ են եկել տարիքային առաջին փոփոխություններն ու մանր կնճիռները․
• մաշկը տուժել է արևից՝ կան ֆոտոծերացման նշաններ․
• անհրաժեշտ է նախապատրաստվել պլաստիկ վիրահատությանը կամ վերականգնվել դրանից հետո․
• կան սպիներ, պիգմենտային բծեր կամ ճարպագեղձերի աշխատանքի խանգարում՝ որպես համալիր խնամքի մաս։

Ինչպես է ազդում հիալուրոնաթթուն

Հիալուրոնաթթուն ջուր է պահում մաշկում։ Տարիքի հետ, արևի և չոր օդի ազդեցությամբ այն պակասում է, և մաշկը կորցնում է խոնավությունն ու առաձգականությունը։ Բիոռեվիտալիզացիայի ժամանակ պատրաստուկը ներարկում են անմիջապես դերմայի մեջ․ այն խոնավացնում է հյուսվածքները և խթանում մաշկի բջիջները, որոնք արտադրում են սեփական կոլագեն և հիալուրոնաթթու։ Այդ պատճառով մաշկը փոխվում է ոչ միայն պրոցեդուրայից անմիջապես հետո, այլև հաջորդ շաբաթների ընթացքում։

Ի տարբերություն ֆիլերների՝ բիոռեվիտալիզացիայի պատրաստուկները ծավալ չեն ստեղծում և չեն փոխում դեմքի ուրվագծերը։ Եթե անհրաժեշտ է շտկել շուրթերի, այտոսկրերի կամ կզակի ձևը, հարմար կլինի դեմքի կոնտուրի պլաստիկան ֆիլերներով։

Ինչպես է անցնում պրոցեդուրան

• բժիշկը զննում է մաշկը, հարցնում առողջական վիճակի մասին և ընտրում պատրաստուկը․
• մաշկը մաքրում են և մշակում հականեխիչով․
• կիրառում են տեղային ցավազրկող միջոց․
• գծանշում են գոտին․
• պատրաստուկը ներարկում են միանգամյա օգտագործման ներարկիչի բարակ ասեղով․
• վերջում մաշկին քսում են հանգստացնող միջոց։

Պրոցեդուրայից հետո ներարկման տեղերում երևում են փոքր ուռուցիկություններ, հնարավոր են կարմրություն և այտուցվածություն․ որպես կանոն, դրանք անցնում են մեկ-երկու օրում։ Ուստի մոտակա օրերին ավելի լավ է կարևոր հանդիպումներ չպլանավորել։ Առաջին օրերին սովորաբար խորհուրդ են տալիս չօգտագործել դեկորատիվ կոսմետիկա, չայցելել բաղնիք, սաունա և լողավազան, արևային լոգանք չընդունել։

Ինչ պատրաստուկներ ենք օգտագործում

Պատրաստուկները տարբերվում են հիալուրոնաթթվի կոնցենտրացիայով, դրա մոլեկուլների չափով և լրացուցիչ բաղադրիչներով։ Բժիշկն ընտրում է դրանք՝ հաշվի առնելով մաշկի վիճակը, տարիքը և գոտին։

• Restylane Vital — հիալուրոնաթթվի հիմքով գել՝ մաշկի խորը խոնավացման համար․
• Bellarti — հիալուրոնաթթվի հիմքով բիոռեվիտալիզանտների շարք դեմքի, պարանոցի և դեկոլտեի համար․ Hydrate, Plus, Extra Plus, Lift, Amino, Vita Plus, Estilla, nUcleo․
• RRS — Hyalift, Hyalift 35, Hyalift 75 proactive, HA Injectable․
• MesoEye C71, MesoWharton P199, MesoXanthin F199․
• NCTF 135 HA և Colibriderm Hydro։

Դրանցից որոշների մասին ավելին կարդացեք Bellarti-ով բիոռեվիտալիզացիայի և MesoXanthin F199-ով մաշկի հակաօքսիդանտ պաշտպանության մասին հոդվածներում։

Քանի պրոցեդուրա է պետք, և երբ է երևում արդյունքը

Առաջին փոփոխությունները սովորաբար նկատելի են դառնում, երբ անցնում են ներարկումների հետքերը․ մաշկն ավելի թարմ և խոնավացված տեսք է ունենում։ Որպես կանոն, բիոռեվիտալիզացիան անցկացնում են կուրսով, իսկ հետո արդյունքը պահպանում են կրկնակի պրոցեդուրաներով։ Միջինում կլինիկական արդյունքը պահպանվում է 3–6 ամիս։ Պրոցեդուրաների քանակը և դրանց միջև ընդմիջումը բժիշկը որոշում է խորհրդատվության ժամանակ։

Ով է անցկացնում

Հարությունյան Սոնա Վահանի — մաշկաբան, կոսմետոլոգ, 20 տարվա աշխատանքային փորձ։ Ավարտել է Մխիթար Հերացու անվան Երևանի պետական բժշկական համալսարանը և կլինիկական օրդինատուրան՝ մաշկաբանություն-կոսմետոլոգիա մասնագիտությամբ, մեզոթերապիայի հավաստագրված մասնագետ և թրեյներ (Skin Tech Pharma Group, Promoitalia, Hyalual և այլն)։

Շիշմանյան Մարինա Էդուարդի — մաշկաբան-վեներաբան, մաշկաբան-կոսմետոլոգ, կլինիկայի գլխավոր բժիշկ, 18 տարվա աշխատանքային փորձ։ Ավարտել է Մխիթար Հերացու անվան Երևանի պետական բժշկական համալսարանը։

Եթե պրոցեդուրան պլանավորում եք արձակուրդից առաջ, կարդացեք՝ երբ անել բիոռեվիտալիզացիա արձակուրդից առաջ։